Biyahe ng LRT-1, natigil dahil sa tumirik na tren

MANILA, Philippines — Pansamantalang natigil ang biyahe ng Light Rail Transit Line 1 (LRT-1) matapos na umano’y tumirik ang isa sa mga tren nito sa area ng Caloocan City kahapon ng hapon.

Ayon kay Jacqueline Gorospe, ang head ng Corporate Communications ng Light Rail Manila Corporation (LRMC), na siyang nangangasiwa sa operasyon ng LRT-1, ganap na ala-1:52 ng hapon nang tumirik ang isang tren nila na biyaheng southbound, sa  pagitan ng mga istasyon ng Monumento at 5th Avenue sa Caloocan City.

Kaagad naman umanong pinuntahan ng kanilang mga technician ang apektadong tren at dinala sa depot upang kumpunihin.

Matapos ang 18 minuto o ganap na alas-2:17 ng hapon ay naibalik na sa normal ang operasyon ng LRT-1.

Ang LRT-1 ang siyang nag-uugnay sa Roosevelt, Quezon City at Baclaran sa Parañaque City.