Bakunang proteksyon umarangkada na rin sa Malabon
MANILA, Philippines — Umarangkada na rin ang pagbabakuna laban sa COVID-19 sa lungsod ng Malabon sa mga health workers at front-liners, kahapon.
Pinangunahan ito ni Mayor Lenlen Oreta na ginanap sa Ospital ng Malabon, kung saan isinagawa ang “ceremonial vaccination” ang alkalde at unang binakunahan si Dr. Mitzi Tanchoco na doktor sa nasabing ospital.
“Alam nating marami pa rin ang takot at nangangamba sa ngayon pero umaasa kami na sa pamamagitan nito, mas marami pang pamilya ang mahikayat na magpabakuna alang-alang sa kanilang mga mahal sa buhay,” pagdidiin ni Oreta.
Katuwang ang Department of Health-NCR sa pangunguna ni Dr. Corazon Flores, MPH, CESO IV, inihayag ng pinuno ng lungsod na hangarin nilang mapabakunahan ang higit-kumulang pitumpung porsyento ng kanilang populasyon.
Dumating din sa pagtitipon sina Congresswoman Jaye Lacson-Noel at Konsehal Enzo Oreta na tumulong din upang himukin ang mga Malabonian na magparehistro para sa bakuna.
“Magpalista na po sana tayo para po handa na tayo at masimulan na ang proseso, yung mga frontliners natin matagal nang nagpa-practice at handa nang gampanan ang mga tungkulin nila, hinihintay na lang po natin yung bakuna para sa lahat, pero tayo sa lungsod ng Malabon, handang-handa na,” paalala ni Oreta.
- Latest
