Pinoy UK variant patient, negatibo na sa COVID-19
MANILA, Philippines — Tuluyan nang gumaling ang lalaking unang nagpositibo sa UK COVID-19 variant matapos magnegatibo na ito sa huli niyang swab test.
Sa inilabas na statement ng Quezon City Epidemiology and Surveillance Unit, sasailalim na lamang sa final assessment ang lalaki bago ito payagang makauwi sa kanyang pamilya.
Wala na rin umanong nakikitang anumang sintomas sa naturang pasyente kung kaya’t dapat na itong pauwiin.
Ngunit mananatili pa rin umano ang gagawin nilang monitoring sa nasabing pasyente para matiyak na tuluy-tuloy na ang kanyang paggaling.
Ang nasabing lalaki na taga-Brgy. Kamuning ay unang tinukoy na positibo sa UK CO-VID-19 variant matapos ang kanyang biyahe sa Dubai at dumating sa bansa nitong January 7.
Sinasabing bago ito magtungo sa Dubai ay negatibo naman ang kanyang swab test at pinaniniwalaang nakuha niya ang bagong variant ng virus nang siya ay pauwi na ng Pilipinas.
Gayunman, sinasabing nagpositibo naman sa virus ang kanyang nobya at ina.
- Latest