Walang ibang uri ng paggamot sa UK COVID-19 variant
MANILA, Philippines — Katulad pa rin ang uri ng gamutan sa orihinal na COVID-19 ang isinasagawa ng mga pagamutan sa mga magiging kaso ng UK variant na matutukoy sa Pilipinas.
Sinabi ni San Lazaro Hospital’s Adult Infectious Diseases and Tropical Medicine Department head, Dr.Rontgene Solante na wala pang ebidensya na kailangan ng ibang uri ng paggamot sa mga kaso ng UK COVID-19 variant.
“It’s still the same the way we care for these patients, the way we’re giving the investigational drugs, including the support and ICU. More or less it’s totally the same,” ayon kay Solante.
Ngunit pinapalakas na umano nila ang kanilang ‘infection control measures’ sakaling ma-admit sa kanila ang isang pasyente na may taglay ng bagong strain ng virus.
Inihayag pa ni Solante na nakapaghanda na rin sila sa posibleng biglaang pagsikad ng mga kaso ng orihinal na COVID-19 matapos ang mga kasiyahan noong Disyembre.
Sa kasalukuyan, mas mababa pa rin sa 50 porsyento ang ‘occupancy rate’ ng kanilang COVID ward ngunit patuloy ang kanilang monitoring lalo na sa ikatlo at ikaapat na linggo ng Enero.
- Latest
