Pasig River Ferry, balik-operasyon na

MANILA, Philippines — Balik na sa operasyon ang Pasig River Ferry Service kahapon matapos ang ginawang repair sa mga pontoon na nasira sa paghagupit ng bagyong Ulysses.

Maaari nang magtungo ang mananakay sa mga operational stations  sa Pinagbuhatan sa Pasig City; Guadalupe Station sa Makati City; Hulo sa Mandaluyong City; Lambingan sa Sta. Ana, Polytechnic University of the Philippines (PUP), Escolta at Lawton sa Maynila.

Tatakbo ang ferry mula alas-6:00 ng umaga hanggang alas-6:00 ng gabi , mula Lunes hanggang Sabado.

Muling ipinaalala ng Metro Manila Development Authority (MMDA) sa mga pasahero na patuloy ang pinaiiral na health and safety protocols ng PRFS para sa kaligtasan laban sa pagkalat ng  coronavirus disease 2019.

Maaalalang sinuspinde ang operasyon ng PRFS noong nakalipas na dalawang linggo dahil sa nasirang docking platforms o pontoons.