2 pang U-turn slots sa EDSA, isasara sa Lunes

MANILA, Philippines — Dalawa pang U-turn slots sa EDSA ang isasara ng Metropolitan Manila Deve­lopment Authority (MMDA) sa susunod na linggo alinsunod sa proyekto ng EDSA Busway na naglalayong magbigay ng mas mabilis at madaliang pagkilos para sa commuting public.

Ito ay ang U-turn slots malapit sa Oliveros Drive at Balintawak Market na isasara simula sa Nobyembre 23, Lunes.

May inilagay na ring traffic advisory signages sa paligid ng nasabing U-turn slots upang gabayan at maipabatid kaagad sa mga motorista sa paparating na pagsasara nito.

Dahil dito, pinayuhan na ang mga motorista na gamitin ang detour routes.

Ang magmumula sa northbound patungong southbound, ang mga apektadong sasakyan ay maaa­ring gamitin ang Balintawak Interchange, General Malvar/Bagong Barrio U-turn slot.

Ang magmumula sa southbound patungong northbound, ang mga apektadong behikulo ay maaaring gamitin ang Quezon Avenue service road U-turn.

Sinabi ni MMDA Chairman Danilo Lim na patuloy na nakikipag-ugnayan ang ahensiya sa Department of Transportation (DoTr), Department of Public Works and Highways (DPWH), at Land Transportation Franchising and Regulatory Board (LTFRB), sa pagtuklas ng mga paraan upang mapadali ang mas mabilis na paggalaw ng parehong mga commuter at pribadong motorista sa kahabaan ng EDSA.

Itinalaga ng EDSA Busway ang innermost lane ng EDSA bilang exclusive lane ng  mga public utility bus (PUBs) na naglalakbay sa kahabaan ng national highway, mula Monumento sa Caloocan hanggang sa SM Mall ng Asya sa Pasay City.

Ang unti-unting pagsasara ng mga puwang ng U-turn kasama ang EDSA ay nagsimula noong Setyembre ng taong ito.