Publiko, hinikayat ni Mayor Vico na samantalahin ang libreng COVID-19 testing
MANILA, Philippines — Hinikayat ni Pasig City Mayor Vico Sotto ang publiko, partikular na ang mga Pasigueño, na huwag nang magdalawang isip at i-avail ang mga iniaalok na libreng coronavirus disease 2019 (COVID-19) sa kanila.
Ayon kay Sotto, isang magandang pagkakataon ito upang matiyak na ligtas sila mula sa virus.
“Kapag inalok tayo ng Lungsod ng LIBRENG TESTING, tanggapin na natin agad. Huwag lamang ang sarili nating kapakanan ang isipin kundi ang kapakanan din ng iba,” dagdag ni Sotto.
Ani Sotto, sa Pasig ay target ng kanilang isasagawang pagsusuri ang tig-1,000 market vendors, public transport drivers, at mga food handlers.
Random umanong pipiliin ang mga ito sa kanilang database.
“Naiintidihan ko po ‘yung concern nung iba na mawalan sila ng kita habang may covid sila... Pero sana isipin po natin na kung positive tayo at wala lang sintomas, maaaring may nahahawaan tayo...tatagal ang pandemya... may posibilidad na ok ka lang, pero mamamatay ang mahahawaan mo,” paliwanag pa ni Sotto.
Sinabi pa ng alkalde na kung tatangging magpasuri ang mga mamamayan ay higit pang tatagal ang pandemya dahil mas maraming tao ang mahahawa ng virus.
- Latest