120 pamilya sa Muntinlupa inilikas dahil sa pagbaha
MANILA, Philippines — Nasa 120 pamilya o 502 indibiduwal na kinabibilangan din ng mga buntis, senior citizens at mga menor-de-edad ang inilikas ng Muntinlupa City Department of Disaster Resilience and Management dahil sa mga pagbaha sa ilang lugar sa lungsod na dulot ng bagyong Quinta.
Sa ulat ni Muntinlupa Public Informaion Office chief, Tez Navarro, pansamantalang dinala sa Poblacion covered court ang may 68 pamilya habang sa Buli Covered Multi-Purpose Hall naman dinala ang nasa 46 pang pamilya at sa Bayanan Baywalk covered court ang 6 pang pamilya.
Ang medical team ng Brgy. Poblacion Health Center ay nagsagawa ng check-up at nagbigay ng libreng gamot sa mga evacuees naman na dinala sa Muntinlupa Elementary School.
Naglagay din ng breastfeeding station sa Poblacion evacuation center para sa mga nagpapasusong ina.
Kabilang naman sa binahang lugar ang Rizal, Aplaya at Quezon, Aplaya na umabot sa beywang ang baha dakong alas-8:26 ng umaga.
Hanggang tuhod naman ang baha sa Levis Compound, Espeleta, Pantalan at Buli, Aplaya.
- Latest