MANILA, Philippines — Labintatlong preso mula sa Caloocan City Custodial Facility na pawang mga positibo sa rapid testing ang pumuga mula sa detention facility kahapon ng madaling araw.
Target na ngayon ng manhunt sina Martin Mama, 46; Gerrymar Petilla, 21; Hudson Jeng, 42; Aldwin Jhoe Espila, 25; Reymark Delos Reyes,27; Norbert Alvarez, 35; Mark Oliver Gamutia, 21; Jovel Toledo Jr., 27; Arnel Buccat,19; Raymond Balasa, 35; Reynaldo Bantiling, 35; Dunacao Aries, 28 at Tejeros Justine, 22.
Ayon kay Caloocan City Police chief Col. Dario Menor, nangyari ang pagtakas dakong alas-4 ng madaling araw nang butasin ng mga preso ang pader ng kanilang selda. Bagama’t positibo ang resulta sa isinagawang rapid testing sa tumakas na mga preso hindi naman nangangahulugang positibo na nga sa COVID-19 ang mga ito.
Sa kuha sa CCTV, nakita ang pader na binutas ang bahagi ng concrete room na nagsisilbing kanilang detention cell.
Mayroong 31 indibiduwal sa loob ng custodial facility at nakatakdang ilipat sa Bureau of Jail Management and Penology facilities.
Nabatid kay Menor na may kabuuang 15 detainees ang nakatakas mula sa facility ng mga detainees ngunit nahuli ang dalawa .
Ang iba sa detainees ay namalagi na ng 21 araw sa facility o lagpas sa 14 na araw na incubation period ng virus.
Simula noong Lunes ay dahan-dahan na palang sinisira ang likurang pader ng kulungan kung saan dalawang pulis lamang ang naka-istasyon at hindi napansin ang balak ng mga preso.