Curfew sa Makati sa Simbang Gabi, 3 oras na lang
MANILA, Philippines — Ipatutupad sa Makati City ang tatlong oras lamang na curfew sa simula ng tradisyunal na Simbang Gabi upang makadalo sa misa ang Makatizens.
Kabilang ito sa updated guidelines ng Executive Order No. 25 ni Makati Mayor Abby Binay.
Samantala, simula naman ng Oktubre 20, 2020 (Martes), habang nasa ilalim ng General Community Quarantine (GCQ) ang lungsod, iiral naman ang apat na oras na curfew na mula alas 12:00 ng hatinggabi hanggang alas-4:00 ng madaling araw.
Gayunman, pagsapit ng Disyembre 16, 2020 ang curfew hours ay hanggang alas-3:00 ng madaling araw lang upang mabigyang-daan ang pagnanais ng mga Katoliko na makadalo sa Simbang Gabi.
Exempted naman sa curfew ang mga nagtatrabaho na may schedule ang pasok sa loob ng curfew hours, mga health worker, authorized government officials, sa mga lumalabas ng bahay dahil sa medical at humanitarian reasons, mga patungo sa airport para sa travel abroad, mga taong ang trabaho ay nasa basic services at public utilities, mga tagadeliver ng pagkain at gamit, at essential workforce ng city government.
Hindi rin maaring lumabas ng bahay ang mga menor-de-edad maliban sa medical emergencies.
Ang mga establisimyento naman na nais mag-operate ng exclusive delivery services sa loob ng curfew hours ay kailangang ilagay ito sa Notice of Re-opening at ang hintayin ang confirmation sa pamamagitan ng email mula sa Business Permit and Licensing Office (BPLO).
- Latest
