MANILA, Philippines — Pagpatay at pagnanakaw ng tandem sa isang company messenger, planado. Hindi lamang pagnanakaw ang motibo sa pagpaslang sa rider na si Luigi Hernando kamakailan sa Valenzuela City.
Ito ang binigyan diin ni Valenzuela Police chief Colonel Fernando Ortega sa pagsasabing planado ang pagpaslang sa biktima.
“Ang primordial intent niya is ‘yung murder. Secondary lang ‘yung pagkuha ng pera,” ani Ortega.
Paliwanag ni Ortega, bagama’t kita sa CCTV na pagnanakaw ang motibo, may nakita rin silang ebidensiya na ang krimen ay planado. .
Tumanggi naman si Ortega na ibunyag pa ang kanilang imbestigasyon sa pangamba na ma preempt ito.
Pinagbabaril ng riding-in-tandem si Hernando noong Oktubre 9 sa Barangay Paso de Blas habang papauwi na mula sa banko. Nang matumba ang biktima, kinuha ng mga salarin ang bag ni Hernando na may lamang pera at tinangay din ang kaniyang motorsiklo.
Ang biktima, nagtatrabaho bilang messenger at collector sa isang kompanya.