LRT-1 nagkaaberya, biyahe naantala
MANILA, Philippines — Naantala ng mahigit 30-minuto ang biyahe ng Light Rail Transit Line 1 (LRT-1) kahapon dahil sa isang nagkaaberyang tren sa area ng Quezon City.
Batay sa paabiso ng LRT-1, dakong alas- 9:24 ng umaga nang magpatupad ng 15 kilometer per hour na speed restriction sa Balintawak Station.
Bunsod umano ito ng isang depektibong tren sa naturang istasyon.
Pagsapit naman ng alas- 9:31 ng umaga nang ianunsiyo ng LRT-1 na nagpatupad na sila ng stop for safety mula Balintawak hanggang Yamaha Monumento Station (NEP Area).
Dahil dito, naging limitado ang operasyon ng mga tren at ang biyahe ay mula lamang Baclaran hanggang Yamaha Monumento Station lamang at pabalik.
Kaagad namang inayos ng team ng LRT-1 ang problema at pagsapit ng alas- 9:57 ng umaga ay naibalik sa normal ang operasyon ng mga tren.
- Latest