P2.7 milyong shabu nasamsam sa ‘tulak’

MANILA, Philippines — Aabot sa P2.7 mil-yong halaga ng shabu ang nakumpiska ng mga operatiba ng Anti-Drug Unit ng Sta. Ana Police Station sa isang notoryus na ‘tulak’ sa ikinasang buy-bust operation, kahapon ng madaling araw sa lungsod ng Maynila.

Kinilala ang nadakip na si Christian Bello, alyas Ian, 28, nakatala sa drug watchlist ng Sta. Ana Police.

Sa ulat ng pulisya, alas-5 ng madaling araw nang magkasa sila ng buy-bust sa may kanto ng Sampa­guita Extension at Eloriaga St. sa Sta. Ana makaraan na isa nilang asset ang magpanggap na buyer.

Matagumpay na nakabili ng isang plastic sachet ng shabu ang poseur buyer. Dito na lumantad ang mga nakaantabay na mga pulis at ipinatupad ang pag-aresto sa nakorner na suspek.

Nakumpiska sa po-sesyon ni Bello ang isang ‘‘heat-sealed plastic sachet’ at apat na ‘knot-tied plastic’’ na naglalaman ng tinatayang 405 gramo ng shabu na may halagang P2,754,000.