Pasay LGU maagang pinasimulan ang ‘no face shield, no ride’

MANILA, Philippines — Nakikipag-ugnayan na ang Pasay City official sa mga samahan ng tricycle at pedicab drivers at operators sa Pasay City para sa maagang pagpapatupad ng  ‘no face shield, no ride’ policy.

Kabilang ito sa paghahandang ginagawa ng Pasay Local Government Unit (LGU) sa pagsisimula ng Memorandum Circular 2020-014 ng Department of Transportation (DOTr) na nagsasaad na, “… this is to mandate all officials/heads of various transportation sectors to enjoin within their respective jurisdictions the mandatory wearing of face shields (aside from face masks) for ALL passengers in areas where public transportation is allowed, effective on 15 August 2020.”

Ayon kay Pasay Mayor Emi Calixto-Rubiano, ang pagsusuot ng face shields sa pampublikong transportasyon ay magiging bahagi na ng minimum health protocols laban sa virus, kasama ang pagsusuot ng face mask, pag-obserba ng physical distancing at regular na paghuhugas ng kamay.

“Nanawagan ako sa lahat ng mga Pasayeño pati sa mga bumibisita sa ating lungsod, na makipag-cooperate sa ganitong hakbangin. Ito ay para sa kapakanan ng lahat”, dagdag pa ng alkalde.

Ang mahigit 4,000 tricycles sa Pasay City ay pinapayagang mag-operate sa ilalim ng quarantine measures base sa color-coding scheme upang mabigyan ng pantay na oportunidad ang bawat isa na makapasada at kumita, habang natitiyak naman ang limitadong bilang ng mga sasakyan sa kalsada kada araw.

Isang pasahero lang ang pinapayagan kada tricycle at walang back ride. Kailangan ding may barrier sa pagitan ng driver at pasahero. Dapat ding regular na dini-disinfect ang yunit.

Ang mga E-trikes, colorum at E-bike ay hindi pInapayagang kumuha ng pasahero. Samantala, ang mga samahan naman ng pedicab dri­vers and operators ay nauna nang nagdesisyong huwag munang bumiyahe habang may community quarantine.