LSIs huwag munang magtungo sa pier-PPA
MANILA, Philippines — Nanawagan ang pamunuan ng Philippine Ports Authority (PPA) sa mga ‘locally standed individuals (LSIs)’ na gustong makauwi na ng kanilang probinsya na huwag munang magtungo sa pier hanggang hindi natatapos ang ‘modified enhanced community quarantine (MECQ)’.
Ito ang panawagan ni PPA General Manager Jay Santiago makaraan na nasa 275 LSIs ang nananatili ngayon sa Manila North Harbor at pansamantalang nanunuluyan sa mga bakanteng container vans.
Sinabi ni Santiago na suspendido pa ang lahat ng uri ng pampublikong transportasyon maging ang biyahe ng mga barko sa ilalim ng MECQ. Inabisuhan niya ang mga LSI na patapusin muna ang MECQ bago umasa na makakauwi sa kanilang probinsya.
Magtatapos lamang ang ‘moratorium’ sa pagbiyahe sa mga LSI sa Agosto 21, ayon pa kay Santiago.
Kailangan din umano na bago magtungo sa pier ay kailangang kumpirmado na ang kanilang biyahe sa barko kung hindi ay maiiwan sila at makakasama sa istranded sa pier.
- Latest