Centralized na basurahan para sa face mask, face shield iminungkahi
MANILA, Philippines — Iminungkahi ni Caloocan City Councilor Vince Hernandez ang paglalagay ng “centralized” na basurahan sa bawat barangay para sa gamit nang face mask at face shields.
Ayon kay Hernandez, hindi lamang pagpapatupad ng quarantine protocols ang panlaban sa pagkalat ng coronavirus disease (COVID-19) kundi ang tamang pagtatapon ng basura lalo na ang mga ginamit na face mask at face shield.
Ani Hernandez, ang lahat ng barangay ngayon ay dapat magkaroon ng “designated common trash bins” o sentralisadong basurahan na laan lamang sa mga gamit nang face masks, face shields at iba pang personal protective equipment (PPEs).
“Kailangan magsiguro tayo na contained natin ang mga materyales na ito sa isang lalagyan o lugar dahil baka may virus pa ang mga ‘to kasi ‘di ba ang gamit ng face mask at face shield ay sanggahin ang virus para hindi pumasok sa ilong o bibig ng tao o dumikit sa mukha para hindi tamaan ng COVID-19,” ani Hernandez.
Nauna nang nanawagan si Caloocan City Mayor Oca Malapitan hinggil sa tamang pagtatapon ng basura. Aniya, dapat ay sinusunod ng mamamayan ang tamang “segregation scheme” sa lahat ng kabahayan at barangay.
- Latest