73-anyos na lolo, patay sa flashflood sa Quezon City
MANILA, Philippines — Isang 73-anyos na lolo ang binawian nang buhay makaraang maanod sa rumaragasang tubig sa isang creek sa Brgy. Kamu-ning sa Quezon City, kahapon ng hapon.
Ang bangkay ng biktima ay nakita sa kabilang barangay.
Sa kuhang video habang nasa kasagsagan ng malakas na buhos ng ulan ay makikitang malakas ang agos ng tubig sa creek sa may K6 sa Quezon City.
Nakita rin dito na may ilang kabahayan na nasa gilid ng creek ang tinangay ng agos.
Ayon kay Dennis Cabatit, kagawad ng Barangay Kamuning, biglaan ang pagtaas ng tubig sa creek at palaisipan kung bakit ito nangyari.
Sinasabing 10 barung-barong ang inagos ng malakas na agos ng tubig sa creek kasama ang bahay ng namatay na senior citizen.
Dahil sa malakas na buhos ng ulan kahapon, marami pang mga lugar sa QC ang dumanas ng matinding pagbaha lalo na sa may Araneta Avenue, E. Rodriguez at may Barangay Pinyahan.
- Latest