3 Koreano na miyembro ng criminal group, nalambat
MANILA, Philippines — Tatlong miyembro ng Korean Voice Phishing Criminal Group na pawang nahatulan na ng 10 taong pagkakakulong sa Korea ang nalambat ng mga operatiba ng National Capital Region Police Office (NCRPO) gamit ang Interpol Red Notice, sa Fort Bonifacio, Taguig City, kamakalawa.
Kinilala ang mga nadakip na pugante na sina Kwon Hyeoksoo, 39; Sim Dong Woo, 39; at Lim Yeongjun, 36, pawang residente ng Unit 302 Lucerne Building, Asteria Residences, Brgy. San Isidro, Parañaque City.
Sa ulat na ipinadala kay NCRPO chief, P/Major General Debold Sinas, isinagawa ang pag-aresto matapos makipag-ugnayan sa Fugitive Search Unit ng Bureau of Immigration ang mga awtoridad.
Sa pamamagitan ng hawak na Interpol Red Notice, inaresto ang tatlo dakong alas-11:45 ng umaga at dinala sa Metro Manila District Field Unit Office, sa SPD Compound, Lawton Ave., Fort Bonifacio, Taguig City.
Sa imbestigasyon, ang tatlong banyaga ay pawang miyembro ng nasabing grupo na sangkot sa online loan fraud sa Pilipinas at Korea.
- Latest