P200 milyong pondo inilaan ni Isko para sa bakuna vs COVID-19

MANILA, Philippines — Naglaan na ang pamahalaang lungsod ng Maynila ng P200 milyong pondo buhat sa kanilang 2021 budget para sa pagbili ng bakuna kontra sa coronavirus disease (COVID-19) para sa mga Manilenyo.

Hiniling na ito ni Manila Mayor Isko Moreno sa Manila City Council sa pangunguna ni Vice-Mayor Honey Lacuna para makatiyak na may magagamit silang pambili ng bakuna sa oras na may nagawa at naaprubahan nang panlunas sa COVID-19.

“In preparation for the end game of this crisis, I have asked VM Ho­ney Lacuna and the City Council na magtabi po, top appropriate P200 million sa 2021 budget na gagamitin bilang pambili ng COVID-19 vaccine,” ayon kay Moreno.

Ginawa umano ito para makatiyak na agad na maseserbisyuhan ang mga taga-Maynila at tuluyang mapuksa ang virus sa kapitolyo ng Pilipinas.

“In case po na mayroon na, handa na po ang lungsod ng Maynila,” pagtitiyak pa ng alkalde.

Nakipag-ugnayan na rin si Moreno sa mga malalaking internasyunal na pharmaceutical companies na nagsasagawa ng pananaliksik sa bakuna.  Tumanggi naman siyang maglabas ng iba pang detalye sa kanilang mga napag-usapan dahil sa pagiging sensitibo ng ibang impormasyon.