Dahil sa matitigas ang ulo: Navotas City, 2 linggong ila-lockdown
MANILA, Philippines — ‘Ang tigas ng ulo ng mga tao.’
Ito ang binigyan diin ni Navotas City Mayor Toby Tiangco kaya nagdesisyon siyang isailalim ang buong lungsod sa dalawang linggong lockdown laban sa COVID-19 simula sa Hulyo 16.
Ayon kay Tiangco, patuloy ang pagtaas ng kaso ng COVID-19 sa lungsod dahil sa patuloy na paglabas ng bahay ng mga residente at hindi pagsunod sa health protocols.
“Kailangan namin gawin ‘to, wala kaming choice kasi ang tigas ng ulo ng tao, eh,” ani Tiangco.
Hihigpitan din aniya nila ang mga leisure activities at exercises na kadalasang dinadagsa ng mga residente at nalilimutan ang social distancing.
Gayunman, bukas ang mga negosyo at papayagang makapasok sa trabaho ang mga empleyado.
Nabatid kay Tiangco, hinihintay lamang nila ang augmentation force na ni-request nila sa Department of the Interior and Local Government (DILG) upang masimulan na ang implementasyon ng lockdown sa Navotas City.
Itinaas din sa P1,000 mula sa P300 ang multa sa mga magulang na hahayaang maglaro sa labas ng bahay ang kani-kanilang mga anak.
Nilinaw ni Tiangco na hindi nila nais na mangolekta sa halip ay leksyon at pagdidisiplina sa mga magulang at anak na nasa lansangan ang nais nilang bigyan ng ngipin.
- Latest