2 kidnaper ng Malaysian nasakote ng PNP-AKG
MANILA, Philippines — Naaresto ng Philippine National Police-Anti Kidnapping Group (PNP-AKG) sa isang entrapment operation sa Angeles City, Pampanga ang dalawang dayuhan na dumukot sa isang Malaysian noong Mayo 16.
Sa ginanap na press briefing sa Camp Crame, sinabi ni PNP-AKG director, Brig. Gen. Jonnel Estomo na ang mga suspek na sina Rano Herman, Indonesian at Ong Way Plak, Malaysian ay nadakip sa parking lot ng isang mall sa Brgy. Malabanias sa Angeles City sa Pampanga, kamakalawa ng hapon.
Nakatakas naman ang Filipino driver ng mga suspek.
Nailigtas naman sa Room 1416 , 14th Floor ng Dormitory 1, Sun Valley, Angeles, Pampanga ang biktimang si Lee Jun Sheng, na isang Malaysian.
Lumilitaw na ang insidente ng pagdukot sa biktima ay inireport ng Office of the Representative mula sa Embassy of Malaysia sa pamamagitan ni Consul Abdul Samad Ismail.
Batay sa report, humihingi ang mga kidnapper ng 12,000 Chinese renminbi (mahigit P84,000) na karagdagang ransom mula sa pamilya ng biktima.
Dahil dito, agad na isinagawa ang entrapment operation sa pangunguna ni P/Col. Villaflor Bannawagan.
Nakakulong na sa AKG headquarters sa Camp Crame ang mga suspek habang inihahanda ang pagsasampa ng kasong kidnap for ransom.
- Latest