Biyahe ng LRT, nalimitahan dahil sa saranggola

MANILA, Philippines — Pansamantalang nalimitahan ang biyahe ng Light Rail Transit Line 1 (LRT-1) kahapon ng hapon sa area ng Quezon City dahil sa isang saranggola.

Sa isang paabiso, sinabi ng pamunuan ng LRT-1 na isang saranggola ang sumabit sa catenary ng Balintawak Station northbound dakong alas-12:20 ng tanghali.

Dahil dito, napilitan silang magpatupad ng limitadong operasyon mula Baclaran Station sa Parañaque City hanggang sa Monumento, Caloocan City at vice versa.

Kaagad namang nagtungo ang Engineering Team ng LRT-1 sa naturang istasyon at inalis ang naturang saranggola.

Inabot lamang naman ang aberya ng may kalahating oras at pagsapit ng alas-12:53 ng tanghali ay ‘green and go’ na o balik na sa normal ang operasyon ng LRT-1.

Humihingi naman ang LRT-1 ng paumanhin at pang-unawa dahil sa naganap na aberya.

Ang LRT-1 ang siyang nag-uugnay sa Roosevelt, Quezon City at Baclaran, Parañaque City.