Lugi ng LRT-2 aabutin ng P97 milyon
MANILA, Philippines ? Posible umanong umabot sa P97 milyon ang magiging lugi ng Light Rail Transit Line 2 (LRT-2) ngayong 2020.
Ito, ayon kay Light Rail Transit Authority (LRTA) spokesperson Atty. Hernando Cabrera ay dahil na rin sa may tatlong buwang ban sa transportasyon na ipinatupad ng pamahalaan dahil sa COVID-19 at patuloy pa ring limitadong bilang ng mga pasaherong maaari nilang isakay.
“Kung tama ‘yung naalala kong factor, ang malulugi sa amin magmula nung nag-COVID tayo hanggang end of the year halos mga P97 million ‘yung ating malulugi, ‘yung tinatawag nating revenue loss na masa-suffer namin because napakalimitado ‘yung ating magiging pasahero,” ani Cabrera.
Mula sa dating maximum capacity ng tren ng LRT-2 na halos 1,600, ay nasa 160 pasahero na lamang ang naisasakay ng bawat tren nila ngayon, upang masiguro na naipapatupad ng social distancing at maiiwasan ang hawahan ng virus sa mga pasahero.
Ang nasabing bilang ng pasahero aniya ay wala pang 10 porsiyento ng kapasidad ng kanilang mga tren.
Dahil aniya sa lugi nilang ito, kakailanganin ng LRTA na manghiram ng karagdagang pondo mula sa national government para masustentuhan at maipagpatuloy pa ang kanilang operasyon.
Ang LRT-2 ang siyang nagdudugtong sa Claro M. Recto Avenue sa Maynila at Santolan, Pasig City.
Gayunman, sa kasalukuyan ay nakakabiyahe lamang ito mula sa Maynila hanggang Cubao, Quezon City matapos na masunog ang power rectifier nito sa Katipunan Station noong Oktubre 2019, at nananatili pa ring tigil ang operasyon ng kanilang Santolan, Katipunan, at Anonas Stations.
Target naman umano ng LRTA na maibalik ang operasyon ng mga naturang istasyon bago matapos ang taong ito.
- Latest
