31 brgy. sa Maynila ila-lockdown
Dahil sa mataas na kaso ng COVID
MANILA, Philippines — Para mapigilan ang patuloy na pagdami ng kaso ng coronavirus disease (COVID-19), inilagay sa 48-oras na lockdown ni Manila City Mayor Isko Moreno ang nasa 31 barangay sa lungsod.
Pinirmahan ni Moreno ang Executive Order No. 31 na naglalagay sa mga barangay sa ‘enhanced community quarantine (ECQ)’ at para makapagsagawa ng ‘disease surveillance, rapid risk assessment at testing’ sa mga barangay.
Kabilang sa ilalagay sa lockdown ang mga barangay sa Distrit 1 kasama ang barangays 1, 20, 41, 51, 56, 66, 96, 97, 101, 106, 116, 118, 120, 128, at 129.
Sa District 2 ang Barangays 163, 173, 180, 185, at 215; sa District 3 ang mga barangays 275, 310, 343, at 380; sa District 5 ang mga barangays 649, 724, 766, 775, 811; at sa District 6 ang mga barangays 836, 846, at 847.
Ayon sa Manila Health Department, nagkaroon na ng 147 kaso ng COVID-19 sa naturang mga barangay hanggang nitong Hunyo 29 at nais na mapabagal ito ng pamahalaang lungsod.
Epektibo ang lockdown mula alas-12 ng Sabado ng madaling araw sa Hulyo 4 at magtatapos ng alas-11:59 ng Linggo ng gabi sa Hulyo 5.
Habang nasa lockdown, mahigpit na dapat manatili sa loob ng kani-kanilang bahay ang mga residente maliban sa mga may exemptions tulad ng mga health workers, military personnel, service workers at iba pa na may akreditasyon ng Presidential Communications Operations Office at Inter-Agency Task Force.
Suspendido rin ang operasyon ng mga establisimiyentong pang-komersyo at serbisyo.
Magpapakalat ng mga tauhan ng Manila Police District (MPD) sa naturang mga barangay para ipatupad ang mga protocols sa lockdown katuwang ang mga opisyal at tauhan ng mga barangay.
- Latest