P2.3 bilyong pinuslit na sigarilyo nasabat
MANILA, Philippines — Umiskor ang Bureau of Customs (BOC) at pulisya matapos na masabat ang P2.3-bilyong halaga ng illegal branded cigarettes sa dalawang magkasunod na operasyon sa lalawigan ng Isabela nitong nakaraang linggo.
Sa ulat na P1-bilyong halaga ng sigarilyo ang nasabat sa isang bodega sa may Victoria Alicia, Isabela na sinalakay nitong nakaraang Sabado ng mga tauhan ng Quick Reaction Team (QRT). May mga tax stamps na nakuhang ebidensya na ilegal na ini-export sa ibang bansa ang naturang mga sigarilyo.
Ito ay follow-up sa unang pagsalakay ng BOC, DTI, Naguilian Police, Isabela Police Mobile Force Company at Isabela Provincial Highway Patrol Team sa isa pang bodega ng isang rice mill sa may Brgy. Palattao, Naguilian, Isabela nitong nakaraang Huwebes matapos ang pagkakasabat nila sa isang trak na may kargang mga branded na sigarilyo sa Naguilian.
Naaresto sa operasyon ang apat na Chinese na unang nagpakilalang mga Koreans na sina Wu Jia Jun, 26; Steven Tan, 32; Chen Qong Gong, 37; at Wu Ya Hui, 25; pawang tubong Fokien province sa China.
Nakumpiska sa operasyon ang 2,000 master cases ng iba’t ibang uri ng sigarilyo, 10 units ng cigarette-making machine, at 300 kahon ng raw tobacco na umaabot sa P1.3-bilyong halaga.
- Latest