Pasig, magbibigay ng learning devices sa mga estudyante
MANILA, Philippines — Magbibigay ang Pasig City government ng mga personal learning devices sa mga public school students sa lungsod, upang magamit nila sa muling pagbubukas ng klase.
Sa gitna na rin ito ng kinakaharap na coronavirus disease 2019 (COVID-19) pandemic ng bansa.
Sa kanyang Facebook post kahapon, sinabi ni Pasig City Mayor Vico Sotto na dalawa ang posibilidad na mangyari sa pagbubukas ng klase at ito ay ang pagbabalik ng klase o kaya ay magkaroon ng virtual classes.
Gayunman, anuman aniya ang kalabasan ay naghahanap pa rin sila ng pondo para sa pagbili ng mga naturang personal learning devices para sa mga mag-aaral. Nanindigan pa ang alkalde na anuman ang mangyari ay hindi nila hahayaan na mahuli ang kanilang mga mag-aaral sa mga pampublikong paaralan.
Inihahanda na rin aniya nila ang pagkakaroon ng mas malakas na internet connections sa barangay level para mas mabilis makapag-download ng modules ang mga mag-aaral sakaling tuluyan nang maging virtual ang klase, bilang pag-iingat laban sa COVID-19.
Nakikipag-ugnayan na rin aniya sila sa Department of Education (DepEd) hinggil dito.
- Latest