Higit 77K ‘pasaway’ , lumabag sa quarantine rules-Gen. Eleazar

MANILA, Philippines  — Inihayag  ni Philippine National Police-Deputy Chief for Operations Police Lieutenant General Guillermo Eleazar, na umaabot na sa 77,776 ang lumabag sa ipinatutupad na enhanced community quarantine batay sa pinakahuling ulat na kanilang natanggap.

Sinabi ni Eleazar na 42,729 ang nahuli sa Luzon; habang 15,272 sa Visayas; at 19,775 sa Mindanao ang nahuli matapos na magpatupad din ang ilang probinsya ng quarantine rules dahil sa  coronavirus disease 2019 (COVID-19), base sa datos na inilabas ni Eleazar. Sa bilang na ito, ayon pa kay Eleazar na 20,612 ang naaresto; 3,967 ang napatawan ng multa; at 53,197 ang winarningan lang ng mga pulis.