Preso patay, 1 pa naospital sa siksikang piitan
MANILA, Philippines — Patay ang isang preso, habang isa pa ang nilalapatan ng lunas sa Pasay City General Hospital (PCGH) matapos magkasunod na mag-collapse sa loob ng Station Investigation Detective Management Unit (SIDMU) detention facility ng Pasay City Police, kahapon ng umaga.
Dakong alas-8:00 ng umaga ng Abril 3, nang isugod ng Pasay City Disaster Risk Reduction and Management Office sa nasabing pagamutan si Aprodencio Barrios Jr., 40, may kasong alarm scandal at illegal possession of firearm at residente ng Malibay, Pasay City.
Ayon sa ulat, nangisay hanggang sa matumba si Barrios kaya ipinaalam ito sa duty jailer at dinala sa ospital.
Ilang minuto lamang sa ospital ay binawian na ng buhay si Barrios.
Dakong alas- 8:45 ng umaga nang mag-collapse din sa loob ng selda si Roy Balbon, 41, may kasong iligal na droga dahilan upang isugod din sa nasabing pagamutan. May ilang araw na umano itong nakararanas ng diarrhea.
Nabatid na siksikan ang 120 presong lalaki sa nasabing kulungan na lalo pang nagpapainit ng kondisyon ngayong napakainit din ng temperatura ng panahon. Nasa 28 naman ang babaeng preso.
Kahapon din ay umalalay ang mga tauhan ng Special Weapons and Tactics (SWAT) sa SIDMU para bantayan ang mga presong pansamantalang pinalabas upang makalanghap ng hangin habang dinisinfect naman ang selda.
- Latest
