Namamahiya sa mga health workers, PUI at PUM sa Maynila, kakasuhan
MANILA, Philippines — Mahaharap sa posibleng pagkakulong bukod pa sa multa ang sinuman na mamamahiya at mambabastos sa mga pasyenteng positibo sa coronavirus disease (COVID-19), mga Persons Under Investigation (PUIs), Persons Under Monitoring (PUMs) at mga health workers sa lungsod ng Maynila.
Ito ay makaraang ipasa ng Sangguniang Panglungsod ng Maynila at pirmahan ni Mayor Isko Moreno ang “Anti COVID-19 Discrimination Ordinance of 2020” na magbibigay ng proteksyon sa mga nabanggit laban sa anumang uri ng diskriminasyon.
Kabilang din sa prinoprotektahan ng ordinansang ito laban sa maling pagtrato at pambabastos ay ang mga doktor, nurse, frontliners, volunteer workers at iba pang mga kawani sa sektor ng kalusugan at service workers.
Ayon dito, hindi maaaring harangin ang mga PUI, PUM, frontliners at medical workers na nais umuwi sa kanilang tinutuluyan kung sila ay mayroong maipapakitang COVID-19 clearance mula sa mga health officials.
Sinumang magpapakalat ng sensitibong impormasyon, sa publiko man o sa social media, tungkol sa positibo o pinaghihinalaang pasyente, kumpirmado man ito o hindi, ay maaaring sampahan ng kaso.
Ayon sa ordinansa, sinumang lalabag dito ay magbabayad ng danyos na limang libong piso (P5, 000) at maaaring makulong ng hindi hihigit sa anim (6) na buwan.
- Latest