Mayor ng San Juan nagpa- quarantine

MANILA, Philippines  — Nagpasya si San Juan Mayor Francis Zamora na mag-self-quarantine matapos na ma-exposed sa isang staff niya na nagpositibo sa coronavirus disease 2019 (COVID-19).

Ayon kay Zamora, nagsimula ang kanyang 14-day self-quarantine nitong Linggo, Marso 29, at magtatagal hanggang Abril 11.

Sinabi ng alkalde na nagpasya siyang sumailalim sa self-quarantine matapos na makumpirmang isang staff na nakahalubilo niya ang nagpositibo sa virus.

Tiniyak naman ng alkalde na maayos ang kanyang kondisyon at walang nararamdamang sintomas ng sakit.

Maayos rin naman aniya ang lagay ng kaniyang staff ngunit nagpasya na ring magpagamot.

Tiniyak naman ng alkalde na kahit naka-self-quarantine siya ay tuloy ang kanyang trabaho at monitoring sa lungsod upang matiyak na hindi mapapabayaan ang mga residenteng apektado ng enhanced community quarantine sa Luzon.