Sandra Cam kinasuhan ng murder
Sa pagpatay sa Masbate Vice Mayor
MANILA, Philippines — Inihain na kahapon ng National Bureau of Investigation (NBI) sa Department of Justice (DOJ) ang mga kasong murder at frustrated murder laban kay Philippine Charity Sweepstakes Office (PCSO) Board Member Sandra Cam kaugnay sa pamamaslang kay Batuan Masbate Vice Mayor Charlie Yuson II noong Oktubre 2019.
Bukod kay Cam, kasama sa ipinagharap ng reklamo ng NBI-Death Investigation Division (DID) ang anak nito na si Marco Martin Cam; Nelson Cambaya; Junel Gomez; Bradford Solis; Juanito De Luna; at Rigor Dela Cruz.
Complainant sa reklamo ang maybahay ng vice mayor na si Ginang Lalaine Yuson.
Inirekomenda ng NBI-DID ang pagsasagawa ng preliminary investigation laban sa mga respondents.
Nauna ng itinanggi ni Cam na may kinalaman siya sa akusasyon ng maybahay nang pinaslang na bise alkalde subalit matapos ang imbestigasyon ng NBI ay lumutang ang naging akusasyon ni Gng. Yuson na si Cam ay nasa likod ng pamamaslang sa bise alkalde.
Matatandaang si Yuson III ay pinatay ng mga armadong kalalakihan sa isang eatery na pag-aari ng kaniyang kapatid na barangay chairman sa Sampaloc. Kasama ni Yuson III sina Wilfredo Pineda, 44 at Alberto Alforte na kapwa sugatan sa pamamaril.
Kasama sa alegasyon ni Gng. Yuson ang isyu sa pagiging talunan ng anak ni Cam sa 2019 mayoral election sa Batuan kung saan nagwagi ang anak ni Yuson na si Charmax Jan Yuson.
- Latest
