Miyembro ng Abu Sayyaf, timbog
QUEZON CITY, Philippines — Timbog ang isang sinasabing miyembro ng Abu Sayyaf terrorist group sa isinagawang pagsalakay ng pinagsanib na puwersa ng Quezon City Police District (QCPD) at Criminal Investigation and Detection Group (CIDG) sa Quezon City, kahapon ng umaga.
Kinilala ang nadakip na suspek na si Adzman Tanjal, 32, tubong Sabah Malaysia at nakatira sa Libyan St., Salaam Compound Bgry. Culiat, Quezon City.
Ayon sa report, si Tanjal ay inaresto dakong alas-9:30 ng umaga sa bisa ng search warrant na inilabas ng korte laban sa kanya.
Nabawi mula sa suspek ang isang MK-2 fragmentation hand grenade, isang Colk Mark IV caliber 45 pistol, isang magazine na puno ng bala at live ammunition.
Ang lahat ng nabawing ebidensiya sa suspek ay dinala na sa QCPD para sa proper disposition habang ang suspek ay nakakulong na sa Integrated jail at nahaharap sa kaukulang demanda.
Isang pulis naman na kinilalang si P/Sgt Lou Francis Burawes ang nasugatan sa pagsalakay makaraang tamaan ng bala ng M-16 armalite rifle sa kaliwang paa nang aksidenteng makalabit nito ang gatilyo ng nasabing baril.
Agad naman isinugod sa pagamutan ang nasabing pulis kung saan siya nagpapagaling sa ngayon.
- Latest