Korean timbog sa pagdukot sa kababayan
MANILA, Philippines — Naaresto ng mga elemento ng PNP-Anti-Kidnapping Group (PNP-AKG) ang isang Koreano na sangkot sa pagdukot sa kapwa nito Koreano na nasagip ng mga operatiba sa rescue operatons na isinagawa sa isang condominium unit sa Ermita, Manila kamakalawa ng gabi.
Sa press briefing sa Camp Crame, iprinisinta sa mediamen ang nasakoteng suspect na kinilalang si Na Jin Suk, 36.
Ayon kay PNP-AKG director Brig. Gen. Jonnel Estomo ang nasagip na bihag ay nakilala namang si Kim Byeong Mo, 19. Bandang alas-6 ng gabi kamakalawa nang masagip ang bihag sa Gotesco Towers B na matatagpuan sa N. Concepcion Street, Ermita sa Maynila.
Nabatid na ang biktima ay dumating sa bansa noong nakalipas na Enero 19, 2020 dakong alas-4 ng hapon matapos itong alukin ng isa nitong kaibigan ng trabaho sa Pilipinas.
Ang biktima ay dinala sa Gotesco Towers sa Ermita, Manila at sinalubong ng tatlong Koreano kabilang ang suspect kung saan ipina-surender ng mga ito ang kanyang telepono at passport.
Bandang alas-11 ng gabi naman nitong Enero 20 nang madiskubre ni Byeong Mo na ang kompanya na nag-hire sa kanya ay sangkot sa ilegal na negosyong “voice pishing,” partikular sa ‘telephone fraud’ na ang intensyon ay mangotong. Nagawa namang makatawag ng biktima sa kanyang ina sa Korea at ipinabatid ang kanyang kalagayan pero tuluyan na itong ikinulong sa isang kuwarto sa nasabing condominium.
Nitong ala-1:10 ng hapon kamakalwa ay dumulog naman sina Korean Desk/Police Liaison Chief Inspector Hyosang Kwon at Jinsu Choi mula sa Embassy ng Republic of Korea sa PNP-AKG Luzon Field Unit (LFU) at humingi ng tulong para masagip si Byeong Mo.
Agad namang ikinasa ang operasyon ng mga operatiba ng PNP-AKG Luzon Field Office sa ilalim ng pamumuno ni Lt. Col. Villaflor Bannawagan kasama ang Korean Police sa pamumuno naman ni Consul and Police Attaché Lee Soo Bok na nagresulta sa pagkakaaresto sa suspect.
- Latest