Trader, itinumba sa basketball court

MANILA, Philippines — Patay ang isang negosyante na dating brgy. tanod matapos na barilin ng isang rider  habang ang una ay nanonood ng  basketball sa covered court ng kanilang barangay sa San Jose, Quezon City, kamakalawa ng gabi.

Ang biktima ay kinilalang si Jeffrey Villanueva, 38, may asawa, ng Tendido St., Brgy. San Jose, Quezon City.

Nabatid mula kay Masambong P/Chief Lt.Col. Rodrigo Soriano, na ang krimen ay naganap dakong alas-8:00 ng gabi sa loob ng covered court sa Brgy. Veterans, Calumpit St., Project 7, Quezon City.

Ayon sa report, nakaupo lamang ang biktima at nanonod sa paglalaro ng kanyang mga kaibigan nang lapitan ng suspek at walang sabi-sabing pagbabarilin sa iba’t-ibang bahagi ng katawan.

Nang matiyak na patay na ang kanyang target ay mabilis na tumakas ang suspect sakay ng motorsiklo.

Tinamaan naman ng ligaw na bala ang isang Philip Brondial na noon ay nanonood din ng laro at ngayon ay ginagamot sa hindi na tinukoy na hospital.

Hindi pa batid ng pulisya ang motibo sa krimen na siyang subject ngayon sa ginagawang malalimang imbestigasyon.