NAIA umalerto sa ‘misteryosong sakit’

MANILA, Philippines — Nagpalabas ng kautusan si MIAA general manager Ed Monreal, sa kanyang medical staff at sa mga tauhan ng Human Quarantine sa Ninoy Aquino International Airport (NAIA), para imonitor ang lahat ng pasaherong galing China, Macau at Hongkong na maaaring magpasok sa bansa ng tinatawag na’ mysterious illness,’

Ayon kay Monreal, wala pang makapagsabi kung anong uri ng sakit ang sinasabing ‘mysterious illness,’ na umano’y maaaring makahawa sa mga taong nasa paligid ng may dalang sakit.

“Hindi pa namin kumpirmado kung anong uri ng sakit mayroon ngayon sa China kaya naman ang mga awtoridad nila sa airport ay mahigpit ang ginagawang pagbabantay sa may dalang sakit na ito,” sabi ni Monreal.

Sinabi ni Monreal, na 24/7  niyang pinamomonitor sa kanyang mga medical staffs ang lahat na pasahero mula sa nabanggit na mga lugar.

Pinapayuhan din ang mga empleyado sa NAIA partikular sa arrival area na magsuot ng mga medical mask bilang proteksyon.