2 BIFF nasakote sa Maynila, mga sangkap sa ‘bomba’ nasamsam
MANILA, Philippines — Naaresto ang dalawang hinihinalang miyembro ng Bangsamoro Islamic Freedom Fighters (BIFF) kung saan nakuhanan ang mga ito ng mga sangkap sa paggawa ng Improvised Explosive Device (IED) habang sakay ng isang kulay brown na Toyota Fortuner, sa United Nations Avenue, Paco, Ermita, Maynila, kamakalawa ng hapon.
Sa naantalang ulat, dakong alas-3:15 ng hapon noong Linggo nang maaresto ng mga tauhan ng National Capital Region Police Office-Regional Special Operation Unit (NCRPO-RSOU) sa mga suspek na si Remedios Villojan Habin, 52 at Alvin Gadin, 32 , driver, residente ng Duhat St., Daimar Homes Manuel IV, Pamplona, Las Piñas.
Sa inisyal na ulat ng Manila Police District-General Assignment and Investigation Section (MPD-GAIS) nakatanggap ang MPD-Station 5 ang tawag hinggil sa shooting incident sa nasabing lugar.
Nang puntahan ay inabutan sa crime scene ang isang Toyota Fortuner na light brown, na-flat na ang mga gulong na sinasabing pinagbabaril ng mga operatiba ng RSOU upang hindi na makatakbo habang nakakordon ang area ay rumesponde naman ang Explosive Ordnance Division (EOD) ng MPD dahil sa nakitang mga pampasabog sa loob ng sasakyan.
Inaresto umano ang dalawa at dinala sa RSOU office, at ibinalik sa MPD para sa pagsasampa ng kasong illegal possession of explosives.
Gayunman, sinabi ni P/Lt. Colonel Carlo Magno Manuel na hindi naman masasabing threat sa paparating na Traslacion ang nasabing insidente.
Ayon sa impormasyon, ang cellphone number ng driver na nakumpiska ay konektado sa mga suspek sa Marawi Seige.
May impormasyon umano ang RSOU na pinamunuan ni P/Capt. Jonathan Mostoles na ang dalawa ay kapwa may kinalaman sa serye ng terorismo.
- Latest
