2 arestado sa 1 kilo ng shabu
MANILA, Philippines — Arestado ang dalawang ‘tulak’ ng ilegal na droga nang makuhanan ng isang kilo ng hinihinalang shabu sa isang buy-bust operation na isinagawa sa Port Area, Maynila, kahapon ng hapon.
Dakong alas-2:00 ng hapon nang maganap ang drug operation sa Roberto Oca Sr. St., sa Port Area Maynila, laban sa mga nadakip na sina Hairodin Kasim, security guard at Norhan Palaguan.
Sa inisyal na ulat ng Philippine Drug Enforcement Agency-Calabarzon, target ang mga suspek matapos makakuha ng impormasyon ang pagbabagsak ng iligal na droga ng dalawa sa naturang lugar.
Naging positibo ang operasyon nang mahulog sa bitag ang dalawa ilang minuto pa lang nang ikasa ang operasyon.
Ayon sa PDEA, high grade na shabu na nagkakahalaga ng P 6.8 milyon na nakasilid pa sa tea bags ang nasabat sa mga suspect.
Pinaniniwalaang nagmula sa Baseco Area ang nasabing iligal na droga.
May dalawang linggong isinailalim sa surveillance ang aktibidad ng mga suspek.
Nagsimula ang pagmamanman sa dalawa sa Quirino Grandstand bago magtungo sa Port Area, kung saan nakipagkita sa katransaksiyon na lingid sa kanila ay mga awtoridad.
- Latest