Mister, patay kay misis dahil sa selos

MANILA, Philippines — Dahil umano sa selos kaya nagawang pagsasaksakin ng isang misis ang kanyang mister na naging dahilan ng pagkamatay nito, kamakalawa ng gabi sa Que­zon City.

Ang biktima ay nakilalang si Michael Sarmiento, 35, ng Kasunduan Creek, Brgy. Commonwealth, Quezon City.

Agad namang naaresto ang misis ng biktima na si Jissel 23, warehouse maintenance.

Batay sa imbestigasyon ni P/SSgt. Anthony Tejerero ng Criminal Investigation and Detection Unit (CIDU) ng QCPD, naganap ang krimen dakong alas-9:45 ng gabi sa loob ng tahanan ng mag-asawa.

Sa pahayag ni Christine Joy Sarmiento, kapatid ng biktima, narinig umano niyang nagtatalo ang mag-asawa sa kanilang silid na tila may pinagseselosan ang suspek.

Maya-maya ay narinig na lamang ni Christine Joy na sumisigaw at humihingi ng saklolo ang kapatid na si Michael kaya tinawag niya ang pamangkin na si Rendelyn, subalit nang buksan nila ang pintuan ng silid ng mga ito ay nakita na lamang nilang duguan nang nakabulagta ang biktima  sa sahig habang tulalang nakaupo at hawak pa ni Jissel ang kutsilyong ginamit nito sa pananaksak.

Agad na isinugod sa East Avenue Medical Center ang biktima pero idineklarang dead-on-arrival.