NCRPO full alert sa SEA Games
MANILA, Philippines — Nakatakdang itaas ng National Capital Region Police Office (NCRPO) sa full alert status ang buong puwersa nito sa darating na Nobyembre 25 kaugnay sa pagdaraos sa bansa ng South East Asian (SEA) Games.
“As recommended, November 25 mag-start ‘yung full alert namin up to December 14,” pahayag ni NCRPO Director Police Brig. Gen. Debold Sinas.
For your appreciation for NCR we have 27 areas 19 venues with 24 sports activity for NCR yan first nag arrive na guest natin daan-daan pero ang official deployment po namin mag start ng November 22 that is the first event na darating players nito ang send off po namin will be on Nov. 21 at Bicutan,” ayon pa kay Sinas.
Kasabay nito, sinabi ni Sinas na bawal ang pagdadala ng tubig, malalaking bag, matutulis at matatalim na bagay sa mga sibilyan na manonood ng SEA Games bilang bahagi ng precautionary measure.
Inihayag ni Sinas na mahigit 8,000 pulis ang idedeploy sa Metro Manila sa sports event .
Sa kabila nito, sinabi ni Sinas na wala silang natatanggap na banta sa seguridad sa nasabing makasaysayang event na iho-host ng bansa.
Ang opening ceremony ng SEA Games ay gaganapin sa Philippine Arena sa Bulacan sa darating na Nobyembre 30 kung saan ang makasaysayang event ay tatagal hanggang Disyembre 11 ng taong ito.
Kabilang sa mga venue ng SEA Games ay ang Rizal Memorial Sports Complex, Athletics Stadium and Aquatic Center sa New Clark City gayundin sa Manila Polo Club at iba pa.
Nakatakda namang magsagawa ng dry run at simulation exercise ang PNP para matiyak ang seguridad ng SEA Games.
- Latest
