2 fixer sa Manila City hall timbog
MANILA, Philippines — Dinakip ng mga tauhan ng Manila Police District Special Mayor’s Reaction Team (SMaRT) at ng Manila Civil Registry Office (MCRO) ang dalawang fixer sa city hall nang tangkain ng mga ito na singilin ng P5,000 ang isang mag-asawa para sa pagproseso ng late birth certificate ng kanilang anak.
Agad na ipinakulong ni SMART chief PMajor Rosalino Ibay ang mga suspek na sina Rosalinda Lagatierra, 60, at Catherine Corpuz, 42 matapos na positibong itinuro ng mga biktima.
Ayon kay MCRO chief Atty. Chris Tenorio sumisingil lamang ang lokal na pamahalaan ng halagang P240.00 para sa late registration.
Naaresto ang dalawang suspek sa isinagawang entrapment operation ng SMART at MCRO matapos na magreklamo ang biktimang si Quirico Corpuz.
Paliwanag ng biktima siningil sila ng mga suspek ng P5,000 para umano ayusin ang late registration bago makapag-isyu ng Certificate of live birth. Sinampahan ng kasong robbery extortion, ang dalawang suspek.
- Latest
