Angkas driver at kasabwat na bebot, timbog sa droga
MANILA, Philippines — Nadakip ng pinagsanib na pwersa ng Quezon City Police District (QCPD) at Philippine Drug Enforcement Agency (PDEA) ang isang Angkas driver at kasabwat nitong babae matapos na mahulihan ng 24 na pakete ng shabu sa isang joint buy-bust operation sa Quezon City kamakalawa.
Ayon kay QCPD Officer-In-Charge, P/Col. Arthur Bisnar, ang mga suspek na sina Jomar Ocfemia, 34, ng Brgy. B.L Crame at kanyang kasabwat na si Rhea Calumba, 24, ng Brgy. San Roque, Cubao ay inaresto ng mga tauhan ng Cubao Police Station (PS 7) at PDEA National Capital Region (NCR) dakong alas-9:30 ng gabi sa isang joint buy-bust operation sa 2nd Camarilla St., malapit sa 18th Ave., Brgy. San Roque, Cubao.
Sinabi ni Bisnar na si Ocfemia ay dati nang naaresto ng PS-7 sa kasong pag-iingat at pagbebenta ng illegal na droga noong Nobyembre 8, 2016 ngunit nakapag-avail ng plea bargaining sa Quezon City Regional Trial Court Branch 15, habang si Calumba naman ay isang drug surrenderee ng Brgy. San Roque.
Bago ang pag-aresto ay inilagay umano sa close monitoring ng mga awtoridad at ng barangay officials ang mga suspek matapos na makatanggap ng ulat na bumalik ang mga ito sa kanilang ilegal na aktibidad.
Nang makumpirma ang ulat ay kaagad nang nagkasa ng buy-bust operation ang mga awtoridad laban sa mga suspek, na kaagad na inaresto matapos na mahulihan ng 24-pakete ng shabu, na nagkakahalaga ng P20,400; isang motorsiklo, cellphone at buy-bust money.
- Latest