Misis todas sa sumpak ni mister
MANILA,Philippines — Patay ang isang misis matapos aksidenteng mabaril ng kanyang mister nang magpambuno sa isang sumpak habang nasa kasagsagan ng kanilang mainitang pagtatalo sa loob ng kanilang tahanan sa Brgy. 177 Camarin, Caloocan City, nitong Sabado ng gabi.
Dead-on-arrival sa Dr. Jose N. Rodriguez Memorial Hospital ang biktimang si Maricar Salem, 32-anyos, isang factory worker; habang kusang-loob namang sumuko sa mga pulis ang mister niyang si Rey Andy Capuz, 35, isang construction worker.
Sa ulat ng pulisya, naganap ang pamamaril sa loob ng bahay ng dalawa dakong alas-7:50 ng gabi. Nagkaroon ng mainitang pagtatalo sina Salem at Capuz sa hindi mabatid na dahilan hanggang sa kinuha ng lalaki ang kaniyang improvised shotgun o sumpak.
Nahawakan ng ginang ang baril hanggang sa mag-agawan sila. Sa kanilang pagbubuno ay nakalabit ni Capuz ang gatilyo ng baril at tinamaan ang biktima sa katawan.
Agad namang isinugod ni Capuz ang partner sa Bernardino Hospital bago inilipat sa Dr. Jose N. Rodriguez Memorial Hospital kung saan idineklarang dead-on-arrival dakong alas-9:14 ng gabi.
Nakaditine ngayon ang suspek sa PCP 5 Detention Center at nahaharap sa kasong Homicide sa Caloocan Prosecutor’s Office habang isinuko rin niya ang sumpak na gamit sa krimen.
- Latest
