2 SAF nahulihan ng alak, tabako sa Bilibid
MANILA, Philippines — Nasa ‘hot water’ ngayon ang dalawang pulis na miyembro ng Special Weapons and Tactics (SWAT) unit na nakatalaga sa New Bilibid Prisons (NBP) sa Muntinlupa City makaraang mahulihan ng alak at tabako sa loob ng bilangguan.
Pansamantalang itinago muna ni Bureau of Correction (BuCor) Spokesperson Major Alberto Tapiru ang pagkakakilanlan sa dalawang pulis habang isinasagawa ang imbestigasyon ukol sa pagkakadiskubre sa kanila ng dalawang bote ng alak at 60 piraso ng tabako.
Sa ulat, alas-11 ng umaga nang madiskubre ang bitbit na alak at tabako ng dalawang tauhan ng SWAT sa Control Gate 4 ng maximum compound ng NBP. Kung ibebenta sa loob ng Bilibid, mabibili ang isang litro ng alak sa halagang P6,000 at P4,000 naman kada isang piraso ng tabako na tinatangkilik ng mga presong mayayaman.
Bukod sa kanila, isa pang bilanggo ang nahulihan ng 54 stick ng sigarilyo. Tigas naman sa pananahimik ang preso kung saan niya nakuha ang naturang mga sigarilyo. Nakatakdang sampahan ng kasong administratibo ang dalawang pulis na sinabi ni Tapiru na kapwa bagong talaga pa lamang sa NBP.
- Latest
