Dagdag-bawas sa presyo ng petrolyo
MANILA,Philippines — Magpapatupad ng dagdag-bawas sa presyo ng mga produktong petrolyo ang mga kompanya ng langis ngayong darating na linggo kung saan madadagdagan ang presyo ng gasolina at mababawasan naman sa diesel na ibinase sa takbo ng kalakalan sa internasyunal na merkado.
Sa pagtataya ng mga oil industry experts, nasa P.20 hanggang P.30 sentimos kada litro ang maaaring itaas ng gasolina habang posibleng walang paggalaw o bumaba ng katiting na P.10 sentimos kada litro sa diesel.
Tinataya naman na mababawasan ang presyo ng kerosene ng P.35 hanggang P.45 kada litro ngayong papasok na linggo.
Sa kasalukuyan ay wala pang kompanya ng langis ang nagsagawa na ng price adjustments ngunit inaasahan na karamihan sa kanila ay magpapatupad sa darating na Martes ng umaga.
Ayon sa mga taga-industriya ng langis, ang dahilan ng pagtaas ng presyo sa gasolina ay bahagyang pagliit ng suplay sa Asya kasunod ng maintenance shutdown ng maraming oil refineries. Nabawasan din umano ang imbentaryo ng gasolina ng Estados Unidos kaya umakyat ang presyo sa internasyunal na merkado.
Sa datos buhat sa Department of Energy (DOE), naglalaro ngayon ang presyo ng gasolina mula P44.25 hanggang P56.19 kada litro habang ang diesel ay mula P39 hanggang P44.08 kada litro.
- Latest