2 patay, 1 sugatan sa gumuhong hotel sa Maynila
MANILA, Philippines — Dalawa ang patay habang isa pa ang nasugatan matapos na gumuho ang gusali ng isang hotel sa Maynila kahapon ng umaga.
Isinugod naman sa pagamutan ang sugatang biktimang si Edson Ison na nabagsakan ng debris ng ginigibang limang palapag na hotel na matatagpuan sa Mabini St., Malate, Maynila.
Dakong alas-3:00 ng hapon nang tuluyang makuha sa ilalim ng guho si Melo Ison na sinubukang isugod sa Ospital ng Maynila subalit idineklarang dead on arrival. Makalipas ang ilang oras ay nakuha na rin ang labi ni Jeromie Fabello na natabunan din sa insidente.
Gumamit pa ng drone upang mahanap ang dalawa at iba’t ibang equipment kabilang ang crane para matanggal ang mga bahagi ng gusali na dumagan sa mga na-trap.
Ayon kay Manila Police District Director P/Brig. General Vicente Danao Jr., dakong alas-9:15 ng umaga nang mag -collapse ang gusali habang nasa loob ang 22 construction workers.
Inatasan na rin ni Manila Mayor Isko Moreno ang City Engineering Department head Armand Andres ng malalimang imbestigasyon sa insidente at kung sino ang dapat na panagutin.
- Latest
