Call center agent, huli sa ‘damo’
MANILA, Philippines — Kalaboso ang isang call center agent matapos mahulihan ng mga otoridad ng marijuana makaraang salakayin ang tahanan nito kamakalawa ng gabi sa Brgy. Dela Paz, Pasig City.
Sa ulat ng Pasig City Police, dakong alas-11:00 ng gabi nang arestuhin ang suspek na si Robert Quijano, 36, sa kanyang tahanan sa 14 Edward St., Christine Village, sa naturang barangay.
Bago ang pag-aresto ay nakatanggap ng tip ang mga awtoridad hinggil sa ilegal na aktibidad ng suspek.
Kaagad namang nag-aplay ng search warrant ang mga tauhan ng Station Drug Enforcement Unit (SDEU) sa pangunguna ni P/Cpl Edgar Garcia III , at sa bisa nito ay sinalakay ang bahay ng suspek.
Mabilis na dinakip at binitbit sa presinto ang suspek nang makumpiskahan ng 13 pirasong zip lock transparent plastic sachet na may lamang pinatuyong dahon ng marijuana; isang plastic bag na may lamang ‘di pa tukoy na rami ng suspected marijuana leaves; isang plastic canister na may undetermined quantity ng suspected dried marijuana leaves; isang zip lock transparent plastic sachet na may lamang mga buto ng marijuana, isang plastic bag na may lamang mga hinihinalang marijuana stalk; at isang pulang timbagan.
- Latest
