Hog raisers sa Quezon City binigyang ayuda ni Mayor Joy Belmonte
MANILA, Philippines – Sinimulan na kahapon ni Quezon City Mayor Joy Belmonte ang pagkakaloob ng financial assistance sa mga backyard hog raisers na naapektuhan ng African Swine Fever (ASF) sa Brgy. Bagong Silangan sa lungsod.
Umaabot sa P3,000 halaga ng ayuda na natanggap ng hog raiser sa bawat isang malaking baboy at P1,500 kada biik na isinailalim na sa depopulation o pagpatay sa mga maysakit na baboy.
Sinabi ni Belmonte na ang ayudang pondo ay bukod pa sa livelihood at scholarship program na ipagkakaloob sa mga pamilya ng mga apektadong hog raisers.
Aniya, tutulungan din ang mga illegal hog raisers na magkaroon ng ibang uri ng trabaho para sa kanilang pamilya.
“Hindi natin sila maaaring pabayaan, lalo na sa panahong kailangan nila ng tulong mula sa lokal na pamahalaan. Naririto kami para tumulong hanggang muli silang makabangon mula sa problemang ito,” sabi ni Belmonte.
Sa ngayon ay may 146 na baboy na ang pinatay at nailibing sa QC.
Una nang inutos ni Belmonte ang pagpatay sa mga maysakit na baboy mula sa Sitio Veterans (area 5) at Oriole (area 2) sa Brgy. Bagong Silangan makaraang kumpirmahin ng Bureau of Animal Industry (BAI) na positibo sa ASF ang blood samples na kinuha sa mga natagpuang patay na baboy sa barangay noong isang linggo.
Nanawagan din si Belmonte sa mga barangay officials na nasa 1-kilometer radius na makipagtulungan na kilalanin ang mga informal backyard hog raisers at samahan ang QC veterinary office na kumuha ng blood samples doon para maisumite sa BAI para sa pagsusuri.
- Latest
