Gen. Eleazar pinalagan ang report na drug recycling sa PNP

MANILA, Philippines — Pumalag si National Capital Regional Police Office (NCRPO) Director P/Maj. Gen Guillermo Eleazar sa batikos sa Philippine National Police (PNP) ukol sa pag-recycle ng iligal na droga na iginiit ng heneral na kakaunti na lang ang gumagawa o tuluyang wala na.

“Admittedly, there may still be isolated and limited cases of drug recycling here in the ranks of the Metro police force, but I do not believe these are rampant enough to constitute the primary reason for the continuing drug trade in Metro Manila. In fact, I would like to believe that this drug recycling malpractice is not existent anymore,” giit ni Eleazar.

Ito ay bilang reak­syon sa pahayag ni Philippine Drug Enforcement Agency (PDEA) Director General Aaron Aquino sa “budget hearing” sa Senado na talamak pa rin ang “recycling” ng iligal na droga na nakukumpiska ng PNP.  Hindi umano lahat idinideklara ng mga pulis ang mga nakukum­piskang droga at muling inilalako sa kalsada ang mga kalahati nito.

“I cannot agree completely with PDEA Director Aaron Aquino’s statement in the Senate hearing,” ani Eleazar.  “Unless they can identify to us these said policemen with validated reports, the sweeping statement made by the PDEA Director is not necessarily true, on face value,” dagdag niya.

Ipinaliwanag niya na sa NCRPO, sa pag-uumpisa ng kanyang pamumuno noong Hunyo 1, 2018, agad niyang ni-relieve ang mga pulis na sangkot sa mga kaso ng iligal na droga at sinampahan ng kasong kriminal at administratibo.

Sinibak din niya hindi lang ang mga nasangkot ngunit maging ang buong mga miyembro ng isang police station o police unit sa paniwala na kontaminado na ang mga ito at kailangan ng mga bagong tauhan para malinis na makapag-umpisa ng trabaho.

Dahil dito, alerto na umano ngayon ang mga pulis sa kanilang mga kasamahan na guma­gawa ng mali lalo na sa iligal na droga.

 “As a result, the NCRPO has not recorded any drug-related incident involving its active members in the past several months,” pagmamalaki ni Eleazar.

Kabaligtaran ito ng pagkakadakip nitong Setyembre 14 sa aktibong pulis na si P/Chief Master Sgt. Rahid Sanguan sa isang buy-bust operation sa Taguig City.

Iginiit din ni Eleazar sa PDEA na dapat alamin kung saan nagmumula ang malalaking suplay ng iligal na droga na kanilang nakukumpiska sa mga operasyon at tukuyin kung sino ang mga responsable.