Chinese sugatan sa bundol ng mixer truck

MANILA, Philippines — Sugatan ang isang babaeng Chinese national makaraang mabundol ng isang trak ang sinasakyan niyang Grab car, sa Makati City. Nakilala ang biktima na si Liu Jing, 24, turista at pansamantalang nanunuluyan sa Alphaland, Sen. Gil Puyat Avenue, Barangay Bel-Air, ng nasabing lungsod. 

Nadakip naman ng mga pulis ang truck driver na si Reyman Cosmiano, 27. Sa ulat ng Makati City Police, naganap ang insidente dakong alas-3:30 ng hapon sa westbound lane ng EDSA-Kalayaan-Buendia flyover sa Brgy. Bel-Air, ng naturang lungsod. Sakay si Liu ng isang Grab vehicle na Mistubishi Adventure na minamaneho ni Jose Rodriguez Aquinas nang bigla silang sinalpok ng isang mixer truck na minamaneho ni Cosmiano.

Natumbok ng truck ang likuran ng Adventure kung saan nakaupo ang dayuhang turista na nagresulta ng sari-saring pinsala natamo nito sa katawan.

Kaagad namang isinugod ng Makati Rescue team ang biktima sa nasabing pagamutan upang lapatan ng lunas.  Nahaharap naman ngayon sa kasong reckless imprudence resulting to physical injury at damage to properties si Cosmiano.