Nanghipo ng pasahero: Taxi driver arestado!
MANILA, Philippines – Arestado ang isang taxi driver matapos umanong hipuan at molestiyahin ang kanyang pasaherong estudyante sa Brgy. Barangka, Marikina City, kahapon ng umaga.
Kasong acts of lasciviousness ang kakaharapin nga-yon sa piskalya ng suspek na si Pabiano Makiling, 48, taxi driver, bunsod na rin ng reklamo ng 23-anyos na college student na itinago sa pangalang Alice.
Batay sa reklamo ni Alice sa Marikina City Police, dakong 7:30 ng umaga nang maganap ang insidente sa loob ng taxi ng suspek, habang bumibiyahe sila sa tapat ng Riverbanks Mall, sa Brgy. Barangka.
Sumakay ang biktima sa taxi at nagpapahatid ito sa kanyang paaralan ngunit habang binabagtas nila ang kahabaan ng JP Rizal ay bigla na lang umanong pi-nagtatanong ng mga bastos na katanungan ng suspek ang biktima.
Nagkwento rin umano ito ng mga kalaswaan sa biktima at saka hinawakan siya sa maselang bahagi ng katawan at tinangkang hubaran.
Pinayagan lamang umano ng suspek na makababa ng taxi ang biktima pagsapit sa Katipunan Avenue, sa Quezon City. Hindi naman nag-aksaya ng panahon ang biktima at kaagad na humingi ng tulong sa mga tauhan ng Police Community Precinct 2 (PCP-2), na nagresulta sa pagkakadakip sa suspek na nakuhanan din ng shabu.
- Latest